Duie testi stratti di <i> Puesie di cartulina</i> di Sonia Moretti

Da fà ballà di dulcezza, d’emuzione è di sogni, eccu duie puesie stratte da a racolta Puesie di cartulina, esciutu in u 2009.

Prima puesia

A muntagna
ringrazieghja
u pastore
chì li porta
à spinu i
bestie
e polvere di
piante
à fà spuntà u
fiore...
e so tintennule
i so itinerarii
anziani
chì a facenu
viva
è chì a
traccianu
di vadelli
di latte
- ella chì
appronta
memoria è
figliere -
ringrazia

u cacciadore

chì acconcia a

surgente,

chì cunnosce u

rughjone

è chì rispetta

l'acellu

pè quelli chì sò da

vene,

tandu u

smaraviglieghja

cù li so pughjali

i so lochi stesi

è l'orizonti

è isse brisache

saziate

d'emuzioni

è di prufumi...

peccatu

ci n'hè tanti

à suminà

u focu è

u sterminiu...

Seconda puesia

Daretu à u so
surrisu
forse
si piatta l'odiu,
daretu à a manu
chì si porghje
chè tu a stringhjessi
forse
si piatta a ghjelusia,
l'apa chì cura
i to fiori
cù una pacenza
urtulana
ringrazia la
d'un sguardu,
pè u so
travagliu astutu
penserai à
u mele
ch'elle sò
e ghjente vere...

Date u vostru parè nantu à ste puesie

Duie testi stratti di Puesie di cartulina di Sonia Moretti

Sonia Moretti, uriginaria di Lentu (Custera), hè prufessore di corsu è hè ancu una pueta di prima trinca in a pruduzzione litteraria corsa.

Prima puesia

Seconda puesia