Accolta
GHJuvan’Filici, un strattu da u libru di nuvelle Prighjuneri di Marcu Biancarelli
Da pruvucà a collara di u babbu, Ghjuvan Felici u prutagunista, si mette un pindinu, Ma u pindinu ùn hè a vera ragione di a letica. Quì si intuppanu duie visioni sferente di a sucetà : una auturitaria è chjosa, quella di u babbu, è l’altra più tullerente, muderna aperta a à critica oghjettiva, quella di u figliolu.
GHJuvan’Filici
GHJuvan’Filici si dissi chì issa pindina ch’iddu vinia di fassi metta à l’arichji era di u più bell’effettu. Chì stilu ch’iddu t’avia ! Cù u so capu di piratu, una pindina era guasgi naturali d’avella ! Ma infini... sapia ch’iddu li ci vurria avà à affruntà u sguardu è l’ira di a famidda, chì u Vechju era quantunqua di l’anziana scola, è una rimarca dispiacenti ùn pudia mancà di faddila.
Accidenti à l’anziani militari !« Ind’è no, ùn ci n’hè ma’ statu omini cù i pindini ! » burbuddeti u so babbu stringhjindu i denta.
Ancu quissa avali ! À mè mi pari chì tù intuntisca ! »
Ùn era micca a insulta chì annarbaia u più à GHJuvan’Filici, chì era di quiddi suppurtevuli è n’avia intesu d’altri, ùn era nemmenu u ghjudiziu, chì ùn s’aspittaia mancu à veda u Vechju tradiscia l’anziana scola chì l’avia furmatu ; ciò chì l’annarbaia u più, ma ch’iddu ùn suppurtaia micca di u tuttu, era issu « ind’è no », issu « ind’è no » ch’iddu li risirvia sempri è chì tuccaia à ugni volta, com’è a frezza a più pinzuta d’un archeru spertu.
Par ugni cosa u babbu li sciaccaia issu « ind’è no » in i denta, è ci n’era suttintesi, in issa furmulazioni ! « ind’è no »... « ind’è no »... Parchì, quali eramu « no » ? Eramu meddu chè l’altri ? In quissa a famidda, ùn ci n’era mattaghjati, debbuli, aienti torti, latri è ancu assassini ? « No » eramu a ghjustizia parsunificata ? L’onestità? L’integrità? Ci n’era esempii chì GHJuvan’Filici pudia mintuà di vituparati, di tranchji, è di sviati, frateddi o cugini, chì issu « no » era sinsatu d’integrà... À chì ùn pacaia i so impositi, à chì facia creda ch’iddu parsiguia i studii d’ecunumia è manghjaia i solda ‘lli parenti in cuntinenti, un altru si drugaia è nimu a vulia veda, parchì vedala saria stata com’è d’ubligassi à intarvena, à assuma, è « ind’è no », ben intesa, era chjara chì nimu si pudissi drugà ! « No » ! « No »! Noi altri ùn la spartiamu micca a disgrazia di l’altri ! Eramu più astuti ! « ind’è no » ùn ci era cà sinnati ! È di credala quissa pirmittia di pudenni parlà, di l’altri...
Marcu Biancarelli, Prighjuneri, Ed. Albiana, 2001.
Accidenti à l’anziani militari !« Ind’è no, ùn ci n’hè ma’ statu omini cù i pindini ! » burbuddeti u so babbu stringhjindu i denta.
Ancu quissa avali ! À mè mi pari chì tù intuntisca ! »
Ùn era micca a insulta chì annarbaia u più à GHJuvan’Filici, chì era di quiddi suppurtevuli è n’avia intesu d’altri, ùn era nemmenu u ghjudiziu, chì ùn s’aspittaia mancu à veda u Vechju tradiscia l’anziana scola chì l’avia furmatu ; ciò chì l’annarbaia u più, ma ch’iddu ùn suppurtaia micca di u tuttu, era issu « ind’è no », issu « ind’è no » ch’iddu li risirvia sempri è chì tuccaia à ugni volta, com’è a frezza a più pinzuta d’un archeru spertu.
Par ugni cosa u babbu li sciaccaia issu « ind’è no » in i denta, è ci n’era suttintesi, in issa furmulazioni ! « ind’è no »... « ind’è no »... Parchì, quali eramu « no » ? Eramu meddu chè l’altri ? In quissa a famidda, ùn ci n’era mattaghjati, debbuli, aienti torti, latri è ancu assassini ? « No » eramu a ghjustizia parsunificata ? L’onestità? L’integrità? Ci n’era esempii chì GHJuvan’Filici pudia mintuà di vituparati, di tranchji, è di sviati, frateddi o cugini, chì issu « no » era sinsatu d’integrà... À chì ùn pacaia i so impositi, à chì facia creda ch’iddu parsiguia i studii d’ecunumia è manghjaia i solda ‘lli parenti in cuntinenti, un altru si drugaia è nimu a vulia veda, parchì vedala saria stata com’è d’ubligassi à intarvena, à assuma, è « ind’è no », ben intesa, era chjara chì nimu si pudissi drugà ! « No » ! « No »! Noi altri ùn la spartiamu micca a disgrazia di l’altri ! Eramu più astuti ! « ind’è no » ùn ci era cà sinnati ! È di credala quissa pirmittia di pudenni parlà, di l’altri...
Marcu Biancarelli, Prighjuneri, Ed. Albiana, 2001.
