Accolta
Lampidusa, una canzona di GHJuvanfrancescu Mattei
Lampidusa, isulella in u mare Mediterraniu, hè à spessu u teatru di una disgrazia umana tamanta. Stu testu d’una forza puetica tremenda ci conta a spera è l’addisperu di issi migranti.
Lampidusa
- Basta ch’ella caschi a notte
Basta ch’ella caschi a notte
E stelle elle ùn mi ghjudicheranu
E stelle elle parè ùn ne anu
Fate ch’ella caschi a notte!
O chì s’ella ùn si strappa a tumaglia
Chì s’elli l’abbastanu i soldi
Mi ci vuleranu ricordi
Per azziccammi à ogni stonda d’Auropa
Bona Luna Lampidusa
Pocu nome ch’è tù ùn ai
Bona Luna Lampidusa
Pocu locu pè sbarcammi
Rotti sò l’ansci è i fiati
Rotti si sò l’ansci è i fiati
Si scuzzulanu e vite S’imbuleghjanu e lite
À i cammini tracciati
O ci piovenu addossu i diserti
Si intighjenu di rossu e piaghje
U sangue di u celu schillizza
A debbulezza è e fronde guizze
Di a stizza
Bona Luna Lampidusa
Cusì aghju amparatu
Bona Luna Lampidusa
È a carezza è u scaffu
Sentu u polsu di a vita chì scalda
Sentu u polsu di a vita chì scalda
Un’ accendita è un fracassu
Si face a scrigna d’un ideale
Batte u polsu di a vita
O e sere ùn sò fatte pè dorme
U peghju ùn hè mai di more
U mare l’averà ancu ellu
Ista vergugnaccia d’esse indegnu è dillusu
Luna Bona Lampidusa
Pocu nome ch’è tù ùn ai
Luna Bona Lampidusa
Pocu locu pè sbarcammi
Ghjuvanfrancescu Mattei, A parulluccia, 2014
