Accolta
Da l'Attrachju à l'Albore, una puesia di Francescu Luciani
Dettu da Cathy Campana
Da l'attrachju à l'Albore Fr.mp3 (4.8 Mo)
U scrittu
Da l'Attrachju à l'Albore
Francescu Luciani
- A campagna imbrunisce
È a frisculina hè ghjunta
Si sentenu e voci lisce
Di i pastori à la munta
Ci vole pocu per capisce
Chì a seratina spunta
Eccu ch'ella cala l'ora
È si rode pezzi à pezzi
U chjarore chì innora
I monti è li so tupezzi
Denduli una tinta mora
Pare ch'ella i carezzi
È godu l'ultimi ragi
Chì lucenu à stonde conte
Prima chì u ghjornu basgi
E labbre di l'orizonte
U sole principia à pende
È à punente tramonta
In u bughju chì si stende
A luna hè digià pronta
Nant'à lu mare risplende
È tante fole ci conta
Sott'à e sarrichje appese
Basta ch'un caminu fumi
O ch'elle stianu incese
Duie ruchjate di lumi
Per tradisce ch'in paese
Fermanu unepochi d'omi
È godu l'ultime ruste
D'un fuculaghju chì pienghje
Quandu e so case fruste
Di sonnu u lascianu spenghje
U firmamentu bafachju
'ncende e so prime stelle
Cù lu so estru sintachju
Tendenu l'arechje anch'elle
Stanu à sente à l'attrachju
L'eculu di e paghjelle
A notte cù e so fasce
Si sguassa ogni culore
È mentre chì u tempu pasce
Per'sse lenze di bughjore
Brama sempre di rinasce
Ind'è u più bellu albore
È godu à Diana ch'ùn teme
Di more à lu so tornu
Dendumi l'unica speme
Chì dumane ferà ghjornu…
Francescu Luciani
