Accolta
In Tribunale strattu da Cavallaria paisana di Natale Rochiccioli
Dettu da Vincent Andriuzzi
In tribunale.mp3 (2.82 Mo)
Disegnu : Ed.Rochiccioli
U scrittu
In Tribunale
- - Induva semu ?... Sì vo cuntinuate issu parapiglia, vi lampu tutti fora !
U ghjudice avia fattu l’appellu dipoi una stonda, è ùn ci era manera di sentesi.
- Scamaroni...
- Prisente pà a terza volta.
- Sete accusatu d’avè fattu u scandalu tutta a siratina cù uni pochi di i vostri invitati.
U giandarme chì hà fattu u rapportu dice chì vo aviate u focu adossu...
- Quella di u focu addossu, ùn mi stona : era u vinu di ziù Battì, acetu.
- Acetu o mele, impreme pocu : avete cantatu fin’à mezanotte.
- O sgiò ghjudice... ritinite chì in tutti i paesi civilizati, i teatri...
- Lascemu corre i paesi civilizati. Rispundite.
- Eranu i posti di tessef.
- I vicini anu ricunnisciutu a vostra voce.
- Prova chì i me vicini anu l’arechja ghjusta.
- Allora ricunniscite chì vo erate voi chì cantavate ? Almenu chì vo avissite arrigistratu qualchì discu ?
- Innò, o sgiò ghjudice... Dischi ùn ne aghju ancu arrigistratu. Ma s’è vo fissite dischi cù tuttu u scandalu ch’elli facenu i vinti posti di tessef di stu maladettu quartieru, hè altru cà u scandalu di Scamaroni, chì ùn era cà un sirinatu.
- Ùn sete micca quì par accusà. I vicini si sò pienti.
- Allora, sì i vicini dumandanu a cundanna à morte di Scamaroni, voi à Scamaroni li tagliate u collu ?
- Ùn si parla di taglià u collu à nimu !... Sete cundanatu à pagà cinque centu franchi.
- Quantu ? Cinque cetu franchi ?
- Truvate ch’ella hè troppu, sicura ?
- Innò, o sgiò ghjudice. À u cuntrariu : cridia chì a me voce saria stata stimata di più. L’anu intesa più di trè centu parsonne, face guasi trenta soldi à testa. In Parigi, in li teatri...
- Iè, iè ... và bè. Vecu ciò chì vo vulete dì. Cinque centu franchi è ùn ricuminciate più.
- À beie u vinu acitosu di stu furdanu di Battì ? A vi prumettu, o sgiò ghjudice.
Pruverbiu : À chì palesa, s’impicca
