Accolta
U scappafiatu, un stalvatoghju di Ghjuvanteramu Rocchi
Dettu da Charlotte Rocchi
U scappafiatu (1.68 Mo)
U scrittu
U scappafiatu
Ghjuvanteramu Rocchi
- - E' s'o ci ne cullassimu in paese i mo figlioli chì ne dite ?
A vittura hè quaiò ch'aspetta, pronta à parte.
Aghju lacatu à posta e porte aperte.
- In paese ci hè un fretu chì si secca !
T’agronchja un ditu,
ti ghjala un'arechja...
- V’incenderaghiu un bellu focu
è po inseme inventeremu un ghjocu.
Tenè, ghjucherernu à Morra !
- Allora
ci stemu quì
ch'avemu u nostru « Monopolì »
Ancu, sè tù mettisse a « Télévision » in marchja
nantu a madia ?
tandu sì, cullemu.
- Mi vulete fa turnà scemu ?
A metteraghju alò ! alò !
-In furia i nostri libri !
« Petit Poucet
Rahan, Tintin
Pif è Michey
Peter Pan, Pinocchio, Cosette »
Cù u nostru « Magnétophone à cassettes »
ci lacherai andà in caffè ?
à fà ci un colpu di flippè ?
-Anderete...
Eiu, mentre chì vo ùn ci sarete
penseraghju à u nostru paese
trent'anni fà
quand’avia a vostra l'età.
E' sì u ventu stuzzica a porta, quellu chì tutti si ne porta
li diceraghju chì ghjunghji à fà ?
Ùn ci hè quì più nimu da piglià.
Lascia mi solu vicinu à u focu,
o ingurdò
Ai cutratu e mani in pienu ghjocu
e fiure in l'ochji
e fole in bocca
sì tù scontri i mo figlioli per istrada,
ùn piantà, fila !
Fila chì n’ai fattu troppu.
Oghje hè da tè sì u ghjornu hè stroppiu !
Ghjuvanteramu Rocchi
